O le naunauta’iga o le ta’ita’i o le National, Christopher Luxon ia avea le toe iloilo o le moli lanu moli o loo iai le atunuu i le vaiaso nei o se avanoa ia manino ai tulafono o le faaaogāina o ufi fofoga.
O lea ua manino lava i saunoaga a le Tamaitai Palemia Jacinda Ardern e lē mana’o ia vave see Niu Sila i le moli lanu mūmū, peitai ua ia faailo mai suiga e lē mamao ae faailoa mai faatatau lea i le moli lanu moli o le traffic light system o loo iai.
O lea foi ua saunoa le Palemia e agai e faia tui o le boosters, faaaogā ufi fofoga ma faanofoesea, o gaioiga vave ia e telegese ai le pipisi o le faama’i.
Mai ia Luxon, ua tatau ona faamuta le faaaogā o le traffic light system ae aumai se tonu manino o mea e tatau ona faia e tagata a o toe faaopoopo ai cases o le Koviti i tua i le komiuniti faapea le fūlū.
O le taeao ananafi na amata fono ai minisita o le Koviti e faatatau i le mataupu lenei, ma a o fesiligia ai e Luxon le faaaogā pea o le traffic light system, o loo iai lona mana’o ia avea o se fonotaga ia faamanino mai ai tulafono o le faaaogā o ufi fofoga.
Mai le soifua maloloina ua toe faamanatu i Kiwis ia faaaogā ufi fofoga i totonu o nofoaga faitele, nofoaga e faigata ona tausi ai le va ma isi tagata poo nofoaga pumoomo.
