E mata’utia le vaaiga ua vaaia ma faasalalauina mai i televise i totonu o le atunuu o Myanmar lea na lūlū ai le mafui’e malosi e 7.7 i le fua mafui’e i le Aso Faraile talu ai.

E oo mai i le asō o loo faia pea galuega fesoasoani mo le tau sa’ilia pea o nisi e le’i maua lava talu mai le Aso Faraile aemaise i latou ua tanumia i fale tetele na faaletonu i le mafui’e.

E lūlū tonu le mafui’e a o faifaitetele vesiga i totonu lava ia o Myanmar ma ua faaopoopo atu ia mafatiaga i tagata ma le atunuu, o le vevesi i le va o le militeli ma tagata tau e ‘au i le faatemokalasi faatasi ai ma nisi kulupu e lē o fiafia i le faigamalo o loo tula’i mai.

Ua fai si umi o ia vesiga, ma fai mai nisi ua atili ai ona nunumi le tulaga o iai nei Myanmar.

Fai mai le militeli a le faigamalo e silia ma le 1,600 tagata ua maliliu peita’i e manatu le to’atele e sili mamao atu se aofa’iga sa’o o soifua ua ma’umau mai le mafui’e.

O isi vaega na aafia e le’i oo atu iai le fesoasoani a masini mo le faamamāina o mea faaleagaina, ua faaaogā lava e tagata lo latou malosi e elieli ai fale na solo mo le tau sa’ilia o aiga ma tagata e talitonuina o loo tanumia ai. Fai mai o le mafui’e aupito malosi lea ua aafia ai Myanmar i totonu o le 10 tausaga ua tuana’i.

Puna o Faamatalaga: https://edition.cnn.com/2025/03/29/asia/before-after-myanmar-earthquake-intl-hnk/index.html