Na tua leaga matamataga o mea faapāpā i Waikaraka i Onehunga Aukilani i le po o le Aso Toonai, ma e le gata o le lē fiafia i le mu ae o le leai o se manatu mai o tagata na tuufaatasia lea faamoemoe.
O le finagalo faaalia lea o nisi o mātua na aafia e tusa ma ripoti, ma o nisi nei o le tusa ma le 6,500 na maimoaina lea faaaliga i le Waikaraka Park.
Ua toe faalauiloa i luga o le social media ata videos na pueina i lea po, i le faate’ia o le aumaimoa i le sē mai o se tasi o aloiafi mai mea faapāpā i le nofoaga na nonofo ai le aumaimoa.
O se tasi o le aufaigaluega na fesoasoani e togafitia manu’aga o i latou na mu ai, e aofia ai ma se teineititi.
A o lagona ai le tiga mai manu’aga, na sili atu le lē fiafia o mātua na iai i lea po i le leai o se tasi o le pulega o le Waikaraka Speedway na alu ane se’i fai se tala poo se faatoesega foi.
Ae i luga o le Facebook page a le pulega na tuufaatasia mea faapāpā i Waikaraka, ua faitioina e nisi o loo latou toe aveesea faitioga a tagata e faatatau i le mea na tupu.
Ae mai le sui o le pulega Bruce Robertson, e foliga mai e lē o tele sona silafia i le mea na tupu.
E ui la e lei fiafia uma tagata sa i Waikaraka, i le faaaliga tele o mea faapāpā i Whangarei, ae o se po fiafia tele mo le tusa ma le 9,000 na auai i le Whangarei Fireworks Spectacular lea e lē gata o mea faapāpā, ae faapea le tele o siva, pese, kapa haka ma le tele o isi mea faafiafia.
