Ua moomia le iai o sikulati 24 itula, 7 aso o le vaiaso i Emergency Departments poo ED uma lava i totonu o Niu Sila.
O le talosaga lea mai fomai sinia a o faatupulaia le tele o sauaga ma faaoolima faasaga i tagata faigaluega.
O se talosaga mai fomai sinia ua sau ai a o faatalanoa pea le tetee a fomai sinia ma le matagaluega o le soifua maloloina e ala i le tatau ona sii o latou totogi.
O faamaumauga ua toe aumai i luga e le Australasian College for Emergency Medicine e silia ma le 7,100 sauaga ua faia faasaga i tagata faigaluega i falemai na faamauina i le va o Aperila 2021 ma le 2023 ma o le tele lava o tagata faigaluega i ED.
O loo ta’ua mai ai se tasi o fomai sinia na tu’i e le gasegase e iai aafiaga i lona mafaufau, ma e faapea na mafua ona ua silia ma le 12 itula o faatali le fomai.
I totonu o Niu Sila e i lalo mai o le ‘afa o le aofai o Emergency Departments o loo lava le fuainumera o tagata faigaluega e gafa ma gasegase e sulu atu.
E oo mai i le taimi na tuufaatasia ai tala o le taeao, e lei maua mai se tali a pati tetele e lua, Labour ma le National pe talia le talosaga a fomai sinia.
