O le afiafi nanei i totonu o le Palemene a Niu Sila i Ueligitone, i le va o le itula e 5pm i le 6pm o le a faitauina ai i lona faitauga muamua, le tulafono taufaaofi poo le pili lea na faatuina e le sui Faipule a le Green Party, MP Teanau Tuiono, o loo finauina ai le toe faafoi mai o le sitiseni NZ lea e tatau ona agavaa iai tagata Samoa ae na aveesea i le tulafono o le Citizen (Western Samoa) Act 1982 Bill.
I se pepa o faamatalaga mai le Pacific Leadership Forum a taitai o Samoa, o loo faailoa ai le faamautinoa mai e le susuga i le Faipule, MP Teanau Tuiono, o le faatagana mo soo se tasi e fia auai atu i lena taimi ina ia lagolago i lenei faamoemoe.
Pe tusa o le 4.30pm e moomia ona taunuu ai i latou uma o le a fuafua e auai ina ia maua le taimi e muai faagasolo ai isi fuafuaga e moomia ona faia e pei o siaki mo le saogalemu a o lei agai i totonu i le nofoaga o le a seei ai.
E pei foi ona ta’ua e le Afioga Anae Arthur Anae, o ia o le taitaifono o le Mau a Samoa Sitiseni 2024 i se la faatalanoaga i luga o le Radio Samoa faatasi ma le failautusi o le faalapotopotoga, Susuga Seiuli Sāvea Leofo Tone Peseta, e moomia lava le lagolago malosi a tagata Samoa i lenei afiafi, ia vaai mai le Palemene e lē o manatu māmā le atunuu i lenei mataupu e telē sona aogā mo i tatou.
O le vaiaso nei foi o loo iai i Ueligitone le faigamalaga a le Afioga i le Fofoga Fetalai o le Maota Fono a Samoa, Susuga Papalii Li’o Ta’eu Masipa’u ma lana aumalaga o nisi o sui Faipule, i se valaaulia atu mai le Palemene o Niu Sila, ma e iai le talitonuga o le a auai i latou i le taimi tonu o le a faitauina ai lenei pili i totonu o le Palemene.
