Ua tau faaiuiu le tolauapiga a le Manu Samoa i lo tatou atunuu auā le sauni atu ai i nisi o ana taaloga faavaomalo, ma le Ipu o le lalolagi i Farani, ma o le vaiaso ua mavae na amata ai ona tolauapi faatasi uma ma tapena mo ia taaloga.

O le Aso Lulu o le vaiaso nei na faatoa faataunuu ai le feiloaiga a le Manu Samoa ma le afioga i le Ao o le Malo lea sa molimoli ai upu faamalosiau ma faamanuiaga a le Ao Mamalu o le Malo le afioga Tuimalealiifano Vaaleto’a Sualauvi II i le pulega ma le ‘au atoa, auā lo latou alo faiva i taaloga o loo loma nei.

Le afioga i le Ao o le Malo Afioga Tuimalealiifano Vaaleto’a Sualauvi II.

O le asō le sailiga tupe a le Manu Samoa, o se taumafataga o le aoauli ua faatau ai laulau mo ē fia auai, ma o le a avea ai ma malo faaaloalogia mo se saunoaga faapitoa, se tasi o tama lakapi logologoā o se alo foi o Samoa le susuga Sonny Bill Williams.

O le faaiuga o le vaiaso o le a tuua ai le atunuu e lana aulakapi mo le taaloga e faia i Iapani.