E toa fa sui maualuluga o le malo lea ua ave iai tusi samania o moliaga o le lē usitaia o poloaiga a le faamasinoga (contempt of court) i le tele o vaega e fesootai ma faaiuga fai a le faamasinoga ma le faamalolo lē tumau ai o le Palemene.
O i latou nei e toafa e aofia ai le Taitai o le Vaega faaupufai o le HRPP Tuilaepa Lupesoliai Sailele Malielegaoi, fofoga fetalai o le Malo Tausi Leaupepe Toleafoa Faafisi, le Failautusi o le Fono Aoao faitulafono Tiatia Graeme Tualaulelei ma le Loia Sili Savalenoa Mareva Betham-Annandale.
Faamaonia mai e le tamaitai loia a le Faatuatua i le Atua Samoa ua Tasi Taulapapa Brenda Heather Latu o le Aso Gafua ma le Aso Lua na tuuina atu ai nei tusi samania.
Taua e Taulapapa “ Ua maea uma ona tuu atu tusi i le isi vaega seia vagana ai le Palemia o loo tetee i lea tulaga ae faapea foi lana ofisa o loo taofia le faatinoga o lea auaunaga”
I ripoti a le Samoa Observer na taua ai o Tuilaepa o loo tuuaia i le tele o ana faasalalauga fai faalauaitele e tuumaualaloina ai le galuega a le Faamasinoga, ae le gata i lea o le masalomia i lona faatonuina ai o tagata galulue o le malo ina ia aua nei faatino tiute i le tauaofiaga o le Palemene i le Aso 24 o Me 2021.
O Leaupepe o loo tuuaia i lona faia lea o se faasalalauga i le Aso Sa 23 o me e tolopo ai le tauaofiaga o le palemene. Taua e Leaupepe o loo tumau pea lona manatu o ona tiute faatemokarasi e taofia ai le tauaofiaga o le Palemene ma na mulimulitai lava i le malelega a le Ao o le Malo ina ia tolopo le palemene.
O Tiatia o loo tuuaia i le lē faatinoa lea o lana galuega ma lona solia ai o le vaega 52 o le faavae ma le faatonuga a le faamasinoga i le Aso 17 ma le Aso 23 o Me.
Ae mo le Loia Sili o loo tuuaia i le faia ai o se pepa o faamatalaga (press release) i le Aso 27 o Me masalomia ai le faamasinoga i le lē tutoatasi o ana faaiuga fai. O lea pepa o faamatalaga na mulimuli ane aveese mai luga o upega tafailagi ma faatoese ai Savalenoa i le faamasinoga.
O le Aso 14 Iuni 2021 o le a valaau ai lenei mataupu i luma o le faamasinoga.
