Ua molia nei se alii ma se tamaitai i le maliu o se pepe e lima vaiaso na maua atu o iai manuaga i Kuiniselani i le tausaga talu ai.
O le pepe tama na taunuu atu paramedics i le caravan park i Daisy Hill i Logan i le aso 14 o Iuni 2021, ma faavave atu ai i le falemai mo togafitiga peitai e lei atoa se lua itula ae faailoa ane ua uma lona ola.
Fai mai leoleo ua o latou pueina se alii e 44 tausaga mai Yatala ma le tamaitai 36 tausaga mai Zillmere poo le ta o le fitu i le taeao o le Aso Lulu.
E la te iloa le tamaititi ma o le aso ananafi na tulai ai i le faamasinoga e tali i moliaga.
Saunoa le leoleo o loo feagai ma le suesuega, Mark White o manuaga i le tamaititi e pei ona iloa i le suesuega e le mafua mai i se faalavelave faafuasei.
O loo sailia pea e leoleo nisi e silafia ni faamatalaga i le mataupu lea ina ia fesoasoani ane i suesuega.
