A o tālia e aiga i Samoa o ni alii faigaluega faavaitaimi ua fano soifua i se faalavelave tau taavale i le Aso Lua ua mavae i Melepone i Ausetalia, le aso e molimoli mai ai o la tino maliliu mo sauniga faai’u, ua lipotia le tulai i le faamasinoga i le setete o Vitoria o se alii 25 tausaga o se tagata faigaluega faavaitaimi mai Samoa ona o moliaga e mafua mai i lea faalavelave tau taavale.
Ua faaalia i ia lipoti o moliaga o le avetaavale matautia ua fano ai ni soifua, ma moliaga o le avetaavale matautia ua manunu’a ai ni tagata ua tuua’ia ai Fu’a Moananu.
E toalua na maliliu ae toaiva na manunu’a o tagata uma na malaga i le taavale o se mini-van sa faafoe e lē ua molia.
Ua faailoa e le Minisita o Tupe le afioga Lautimuia Uelese Vaai i tusitala, o loo mataitu e le matagaluega o le tupe ua iai nei le vaaia o le polokalame o galuega faavaitaimi, tulaga uma tau tulafono o loo faagasolo i suesuega o le faalavelave.
Ua ia faailoa foi o le faai’uga i le tuli i Ausetalia o se faasalaga o lē ua molia poo le aumai e tuli i Samoa se faasalaga, o le faai’uga tutasi lea a le faamasinoga i Ausetalia.
