Ua silia i le lua vaiaso talu ona maliliu ni tama tane se toalua e aofia ai se Malu o le Malo i se gaioiga solitulafono na faaaogā ai se laau malosi e lei laiseneina faaletulafono, ae o le Aso Toonai na te’a nei i Salelavalu i Savaii na tulai mai ai se isi faalavelave o loo masalomia na faaaogā ai foi se laau malosi ma ua maliu ai se tamaitiiti ua 12 tausaga lona matua.
Ua faailoa e le Matagaluega o leoleo, falepuipui ma le toe fuata’ina i lana itulau i le api o foliga le faagasolo o suesuega i lea faalavelave i le faai’uga o le vaiaso ua mavae, lea e faapea o le taeao o le Aso Toonai na tupu ai.
E 26 tausaga o se alii ua taofia nei e leoleo ma ua molia i lona faaoo o le maliu i le tamaitiiti e pei ona masalomia sa ia umia le laau malosi o le ituaiga o le 22 rifle poo se pulutasi.
O le aupega ua faaalia e leoleo e lei laiseneina.
O loo masalomia e leoleo o le mafuaaga o le faalavelave e fesootai i se mafutaga faaleuo peitai e lē o faailoaina e leoleo le sootaga o lea faigauo i le tamaitiiti ua fano le ola.
Ua faaalia i se lipoti a le vaega faasalalau o le SamoaGlobal o lē ua maliu o lona tuafafine sa uo ma lē ua molia e leoleo.
O le lomiga a le nusipepa o le Sunday Samoan o loo lipotia ai na faatino le gaioiga solitulafono e lē ua molia ae o loo moe i le tainamu le tamaitiiti 12 tausaga ua maliu.
Ua fautuaina e leoleo le atunuu ia faaaogā le avanoa e lua masina ua amata atu i le masina nei o Aokuso e oo i le faai’uga o le masina fou o Setema e auina atu ai laau malosi solitulafono e aunoa ma le faia o ni moliaga.
