E iai le talavou lea ua molia ona ua feta’uaina le faaoolima i se tasi o teine a’oga i se a’oga i Niu Sa Uelese.
Ua faailoa e le 7News e 16 tausaga o se teine a’oga o loo iai nei manu’aga i lona fatafata ma lima mai le mataupu lea. O le aoauli ananafi na valaau ane ai le taavale a le falema’i i le a’oga o Canobolas Rural Technology High School i Orange.
Lipotia sa togafitia e paramedics ma auina atu ai i le Orange Health Service mo togafitiga. Fai mai leoleo a Niu Sa Uelese o se teineititi 15 tausaga na pu’eina mai le nofoaga lea ma aveina atu i le ofisa o leoleo i Orange.
Ua faia iai moliaga ma e lē o mafai ona tatalaina i tua ma o le asō e tulai ai i le faamasinoga o tamaiti.
O loo faia nei su’esu’ega i le mafuaaga o le mataupu ae o loo ta’ua foi o le lua tausaga talu ai sa aveina atu foi se tasi tamaititi a’oga i le falema’i i Orange ona o manu’aga foi i lona fatafata.
