E na o le 13 tausaga o se tamaiiti ua molia i le fasioti tagata ina ua tulai mai se faalavelave na manu’a tigaina ai se tamaititi 16 tausaga, e masalomia na tatui (tulou) i se falefaatali pasi i Dunedin i le aoauli ananafi.

I faamatalaga a leoleo pei ona lipotia e le televise tasi (1News), o le faalavelave na tulai mai i le te’a o le 3 i le aoauli i le va o i laua nei o loo aafia, ae o loo tau faamautu e leoleo le mea moni na tupu ma le mafuaaga na alia’e mai ai lea faalavelave.

Māua foi i lipoti ma faamaonia e le sooupu a leoleo, na maua i le nofoaga na tupu ai le faalavelave se naifi.

Na faanatinati atu le 16 tausaga i le falemai peitai na maliu mulimuli ane.

O le talavou lea ua molia nei i le fasioti tagata na ave e leoleo ananafi ma na tulai i le asō i le faamasinoga o talavou i Dunedin.

Ua faailoa foi e leoleo ua i luma o le faamasinoga le mataupu ma ua lē mafai foi ona toe faia sa latou faamatalaga ae faamaise i le aiga o si talavou ua maliu.

E toe tulai lē ua molia i le faamasinoga maualuga i le aso 11 o Iuni.

Puna o Faamatalaga: https://www.1news.co.nz/2024/05/24/murder-charge-for-13-year-old-after-fatal-dunedin-bus-stop-assault/