E miliona tala Ausetalia lea ua ofoina e leoleo o le taui lea o se tagata o iai ni faamatalaga e faatatau i le faalavelave na tupu i le 1984 na fasiotia ai se alii e suafa ia Robert Jack Richardson i Vitoria.

Fai mai o Richardson e 49 tausaga i lea taimi sa iai ona sootaga i le au solitulafono e faufau lelei, organised crimes ma sa fuafua e tulai i le faamasinoga ma isi e toalua ona o moliaga o fualaau faasāina peitai na maua lona tino maliu ua lafoai i le togavao i King Parrot Creek Rd i le masina o Mati 1984.

A o lei maliu na mulimuli vaaia ma ni alii se toalua i St Kilda i le vaveao o le aso 4 o Mati o le tausaga lava lea ma e talitonu leoleo e foliga na fasiotia lava i se taimi mulimuli ane o lea lava aso.

O le mataupu lava lea na fesootai ma le taupulepulega o le fasiotia o se malu o le malo, o se leoleo suesue sa avea foi ma molimau i lea mataupu. 

O le faamatalaga a leoleo e faapea o le mataupu lenei sa malosi ona sootaga agai i soligatulafono e aofia ai le Painters and Dockers Union.