Tuisa – Maina Vai
Ua faailoa i le pepa o faamatalaga mai le Komiti o Faalavelave Tutupu Faafuase’i ma le Matagaluega o le Soifua Maloloina le faatupulaia o tupulaga talavou e maua i le vairusi o le Koviti19.
O i latou ia mai le tausaga 15-19 atoa ai ma le 25-29 le matutua. O lo’o faailoa mai le siitia ai o le numera o e a’afia mai totonu o le 24 itula ua tuanai ai i le 220 tagata. E 454 e ua aafia i le vairusi i Upolu ae 13 ua iai le numera o e aafia mai le motu tele i Salafai.
O ia numera ua maua ai le silia i le 400 o i latou ua faamaonia ua maua i le Koviti19 talu mai le aso 17 o le masina nei, e le o faailoa mai i le taimi nei po’o le a tonu le ituaiga o le vairusi o loo maua ai i latou ua aafia, peitai o loo faamauina e le i iai lava se tagata ua aafia mai i motu o Manono ma Apolima.
Ua silia i le 10,000 RAT test ua maea faaoga i Samoa, e aofia ai le silia i le 3000 sa faatinoina ai suesuega mai le Aso Gafua seia aulia ananafi.
O loo fautuaina pea e le Soifua Maloloina le taofiofi o le soona agai atu e faatino suesuega e aunoa ma auga o le faamai o maua ai se tagata. Ae o le tuualalo a le Malo ia faataua le malolo lelei i aiga e tau tu’umamaina ai le pepesi o le faama’i le atunuu.
