O le sao o atunuu o le Pasefika e aofia ai ma Samoa i taumafaiga uma e tali atu ai i taimi o faalavelave faalenatura, aemaise o lu’itau i tapenaga, o se tasi lea o manulauti sa faasoa iai sui o auaunaga o tapenaga i taimi o faalavelave faalenatura i se fono sa usuia i le masina nei o Novema i le atunuu o Palau, ma sa avea ai le ofisa sili lagolago o le pulega o le ofisa tutotonu o tapenaga a Samoa mo faalavelave faafuase’i e fai ma sui o Samoa.
O le faletua le tofa Fesola’i Faamanatu Molly Nielsen e lē gata sa auai i le fono o pulega tau i lea auaunaga mai atunuu o le Pasefika ae sa faatasi atu foi i le fono faaminisita a malo o le Pasefika sa usuia ai foi i le atunuu o Palau sa autū foi i polokalame e tali atu ai i taimi o faalavelave faafuase’i.
Ua talafeagai le taimi o lea faatasiga a minisita ma faauluuluga o ofisa o gafa ma tapenaga i faalavelave faalenatura ma le iai o le Pasefika i le tau o afā ma uiga faaletonu o le tau.
E 5 i le 9 afā o loo valoia mo atunuu i Saute i Sisifo o le Pasefika i Saute ae o Samoa e tasi le afā o loo valoia e ono aafia ai.
