Ua saga mausali pea sootaga faaleuō o Samoa ma Niu Sila i le feagaiga faauō le treaty of friendship ua onosefulu tausaga lona matua.
O le tali faaaloalo a le tamaitai Sui Palemia o Niu Sila, le afioga Carmel Sepuloni ma lana aumalaga o loo i Samoa i le valaaulia o le faamanatuina o le faaiuga o polokalame o le 60 tausaga o le tutoatasi faapea le faamanatuina o le 61 tausaga ua aulia i le aso muamua o lenei masina fou o Iuni, na saunoa ai le Sui Palemia lona 20 a Niu Sila, ma faafetaia le tamaitai Palemia o Samoa i lona avea ma faataitaiga mo tina ma tamaitai o le Pasefika i le avea ai ma uluai Palemia o se malo tutoatasi o lenei itu lagi.
O le tele o taumafaiga o loo galulue faatasi ai malo e lua, ma le fesoasoani o Niu Sila i le atinae o le tamaoaiga o Samoa o se tasi lea o pine faamau o le mafana o le feagaiga faauō.
O le afioga i le tamaitai Sui Palemia o Niu Sila e mai le afioaga o Vailele i le itu o lona tuaa tamā, lea e iai ma lona pito Tonga.
Sa galue i Samoa le tamaitai Sui Palemia o se faiaoga i se tasi o kolisi tuma’oti, a o lei toe taliu i Niu Sila ma mulimuli ane ulufale i upufai o Malo i le tofi faipule.
O lona aiga i Vailele o loo iai le suafa matai o Ulumalautea ma sa auai nisi o lona aiga i le faaaloalo a le Sui Palemia na tapenaina e le ofisa o le haikomesina o Niu Sila i Samoa.
