Ua faamaonia o lea e iai fualaau faasāina o le methamphetamine i totonu o lole na omai i pusa meaai poo food parcels a le Auckland City Mission.
O lea ua toe sau le valaau ma ua fesoota’i foi le City Mission a Aukilani i tagata na o iai pepa lole nei e valaau vave le 111 ma vaai se foma’i.
O le aoauli ananafi faato’ā iloa ai e le Auckland City Mission ina ua toe valaau atu se tasi o tagata na ave iai lole, ma su’esu’e ai loa e le NZ Drug Foundation.
O lole na totoe i le City Mission a Aukilani lea na faia iai su’esu’ega nei ma sau ai le i’uga e faamaonia e tusa ma le 3 kalama methamphetamine o loo iai.
O le asō o loo faaauau ai fonotaga a le City Mission ma le NZ Drug Foundation i le mataupu lava lenei, ma o le asō foi e toe faia ai isi suesuega i le lab a o galulue ai ma leoleo.
I lipoti anapo e lē o mautinoa e le City Mission a Aukilani le to’atele o tagata ua oo atu iai lole nei, ma o ni lole foi o lea na faameaaalofa atu e se tasi e lē o iloa poo ai.
Na saunoa Helen Robinson o le pule sili o le Auckland City Mission, o se tala faanoanoa tele.
Puna o Faamatalaga: Auckland City Mission finds ‘lethal levels’ of meth in donated lollies handed out in food parcels – NZ Herald
