Ua maua lelei i meapueata a le CCTV le ata o se alii ua vaaia le momo’e ese mai ma le nofoaga o loo iai le fale tele o le mansion lea na mu i le vaiaso talu ai mai Sini nei, o se fale fai mai e oo atu i le 24 miliona lona tau.
I lipoti lata mai a le Channel 7 News ua taua ai ua faamatuu mai e leoleo i le asō e video le ata o lea tagata i le taimi na momo’e ese mai ai ma lea fale tele ae vaaia loa le sasao ane o le afi i le tea o le 10 i le po o le aso 3 o le masina lenei o Setema.
Fai mai leoleo sa faaaogaina se vailaau i le faalavelave lea ma o loo tau faamautu pea le ituaiga vailaau na faaaogaina. O loo galulue faatasi foi leoleo ma le e ana le fale i le sailia o lea tagata.
E lei iai se tasi i le fale i le taimi na sasao ai le afi ma e lei iai foi se isi na faamanualia peitai o le fale e fai si tele ma o loo lelei pea i le taimi nei.
E lei iai se tasi ua molia i lea faalavelave ae o loo faia pea suesuega a leoleo.
