E i totonu o le tolu aso na faia ai sa’iliga mo si alii e 23 tausaga lea ua agiga i lipoti o se alo o Samoa e suafa ia Patrick Meafua Jr e pei ona lipotia foi i le 7News, na pa’ū i le vaitafe i Brisbane i le Aso Sa na te’a nei ma ua toe maua lona tino maliu.
Fai mai lipoti sa iai faatasi ma nisi o lona aiga ma uo sa faamanatu ai se aso fanau 21 tausaga e lata i le Jindalee Boat Ramp ae see ai ma pa’ū aga’i i le vai poo le te’a o le ‘afa o le 5 i le vaveao o lea lava aso.
Na amata mai ai sa’iliga a nisi na iai i lea faaitu ma taumafai e lavea’i faatasi ma nisi o ana uo peitai e le’i manuia e pei ona lipotia e leoleo mai Kuiniselani.
O se isi talavou sa oso ane i le vai e taumafai e fesoasoani, na faamanu’alia ai ma ave atu i le falema’i mo togafitiga.
O le sa’iliga o Patrick sa aofia ai leoleo ma le aumāulu, vaega a le SES, Marine and Rescue ma e tolu aso sa faatino ai le su’esu’ega faato’ā maua i le taeao ananafi.
Ua ta’ua e le 7News sa o latou faatalanoaina aiga o lē ua maliu ma ua fautua ane foi i lamatiaga o vaitafe ma ia faaeteete pe a iai i nofoaga faapea, faailoa foi le agaga faafetai o le tuaa o lē ua maliu i le vaega sa feagai ma le sa’iliga o si ona atalii.
Puna o Faamatalaga: https://7news.com.au/news/three-day-river-search-ends-with-body-of-patrick-meafua-jr-recovered-from-river-c-18074527.amp
