Ua ripotia mai le maua ai e le vaega a Leoleo le search team faatasi ai ma le lagolago a matai ma taulele’a o le afioaga o Aopo, le tino maliu o se alii na malemo i le motu tele i Salafai.
Na faailoa e le Sui Komesina o le Matagaluega o Leoleo, Papalii Monalisa Tiai- Keti o loo faaauau pea le sailiga o le tino o le isi alii e to’alua iai i laua na aafia i lenei faalavelave.
O lenei faalavelave na lipotia atu i le Matagaluega i le Aso Toanai ma e faapea ripoti o alii nei e toalua e mai le afioaga o Aopo ma na agai i laua i se la fagotaga i se nofoaga e latalata i Asau i le Aso Toanai ma tulai mai ai loa le faalavelave.
E iai le talitonuga na tafefea i laua i le malolosi o galu o le sami ma na faamaonia e Papalii i le Samoa Observer o le tino maliu o lē ua maua ua auina atu nei i le falemaliu a’o faaauau pea sailiga o le isi alii.
E pei ona silafia o le amataga o le tausaga na tulai mai ai foi se faalavelave faapea i le motu tele lava i Salafai i Samalaeulu lea na malelemo ai foi ni alii se toalua na maua le tino maliu o le isi peitai na taofia sailiga mo le tino maliu o le isi alii ona o le faaletonu o le tau, ma e oo mai le taimi nei le’i maua ai lava le tino o lea alii.
