Ua lipotia i le stuff.co.nz i le asō se tala e faatatau i si ulugalii mai West Auckland na lusi le la 66 afe i le tiposi o le la fale ae ua faailoa se tala fiafia ua mae’a nei ona fausia lo la fale e aunoa ma se totogi ma ua fetaui lelei ma le faaipoipoga a si la tama.
O le ulugalii o Jotika ma Sanjeev Kumar na faaalu a la tupe sa teu i le fausiaina o lo la fale i Glen Eden ma saini ai sa latou konekarate ma le Vikram Gill o le EKG Construction ma le faatuatuaga o lea tagata o se sui o le au faufale a Niu Sila, NZ Certified builders.
Peitai na mae’a le tolu tausaga e lei uma lava le fale ma le anoano o mea sa manaomia ona faia iai ma toe tolopo ai ma le faaipoipoga a lo la alo.
Peitai ina ua faitau se tasi o tagata faufale o Anish Monpara i le lipoti i luga o le upega tafailagi a le Stuff, sa ia ofoina ai loa lona tomai e fesoasoani ai i le aiga e aunoa ma se totogi.
O le mau a le aiga e ana le fale ua tele tupe ua alu ma le umi e tolu tausaga e le uma lo latou fale ae na o le 8 vaiaso sa galue ai Monpara ma ua vaaia iai o se vavega ma o le uluai taimi ua maua ai se malologa lelei ona o le agalelei o lea tagata.
Atonu o ituaiga Samaria agalelei faapei o Monpara o loo matuai manaomia e le toatele o aiga i lenei foi vaitau o le taugata ma le faigata o le soifuaga.
