O fanua tu uta o le atunuu o loo galueaina i faatoaga ae lē oo iai le malosi tau eletise, o nofoaga ia o loo pito aafia i le lē maua o sea auaunaga tāua e fafaga ai maa o telefoni feaveai, pe ola ai foi se televise.

Ua faailoa e le ofisa o le Malo o Ausetalia lona faatupeina o ni masini e maua ai le eletise mai le malosi o le la, e fafaga ai maa o telefoni mo sui o le asosi o le aufaifaatoaga a Samoa sa iai se manaoga mo lea auaunaga.

Ua faaalia i se pepa o faamatalaga, o nisi o le aufaifaatoaga a lea asosi e tau omai i tai i le vaega e maua ai le eletise e fafaga ai maa o a latou telefoni, ma o le galuega matua i aso uma o le vaiaso.

Talu nei ona maua lea fesoasoani i le eletise e maua i malosiaga faafouina poo renewable energy ua lua vaiaso o momoe i le faatoaga le aufaigaluega auā ua faigofie ona fafaga le maa o le telefoni ma ua ola ai foi ma le TV e matamata ai taaloga lakapi.

O le itu tāua i le telefoni feaveai mo sui o le asosi o le aufaifaatoaga a Samoa, ona e maua ai fesootaiga ma faatonu ai tautalaga o oka o fua o faatoaga o loo fia maua mo maketi e pei o faletalimalo ma fale’aiga.