Ua tau le ‘ai o le faamanatuina i lenei vaiaso e le ofisa o le tiute o le aso faavaomalo e faatāua ai le latou auaunaga, i le maua i le latou masini fā’ata e su’e ai pusaoloa mai fafo le Xray-scanner le pauta faasāina o le aisa e tusa lona mamafa ma le 10 kilokalama.
O le afiafi o le Aso Lulu o lenei vaiaso i galuega a le ofisa o le tiute ma le vaega o ta’ifau sosogi a le matagaluega o leoleo na maua ai ia nakoti ma ua faamaonia o le aisa, peitai e iai isi su’ega poo test e toe faia e saga faamautū atili le faamaoniga o ia pauta na maua o le aisa.
Faaalia i se pepa o faamatalaga mai le Matagaluega o le Tiute ma Tupe Maua, o le manuia o ia sa’ili’iliga ona o se galuega fai faatasi a le tiute ma le vaega o ta’ifau sosogi lea e sa’ili ai oloa e ta’ifau ua a’oa’oina.
O le faamanatuina o le aso faavaomalo o auaunaga a ofisa o le tiute na saunoa ai le Sui Palemia o le minisita o lea matagaluega ma ave lana lu’i i le Ofisa Sili ma le aufaigaluega ina ia matuā silasila lelei i le leoleoina o tuaoi o le atunuu, ona ua faateleina le aisa e sao mai i Samoa, aemaise o isi gaioiga solitulafono e fesoota’i i le faaulufaleina mai o oloa eseese i le atunuu.
