Ua tapuaia i le faaiuga o le vaiaso nei le ‘au masii a Samoa o le a tausinio i le taaloga o tuuga vaafaila e faia i Farani, a o lumanai taaloga a le Olimipeka i le taimi o le taumafanafana e talimalo ai lava lea atunuu.
O le tamaitai o Vaimooia Ripley ma le alii o Eroni Leilua o le ‘au lea a Samoa mo ia taaloga faavaomalo o le a tausinio ai atunuu e 20.
O se avanoa e saili ai le tulaga agavaa e tausinio ai i taaloga a le Olimipeka aemaise foi o le sailiga o le siamupini mo lea tuuga vaafaila e faia i tausaga uma.
Ua faailoa mai i se pepa o faamatalaga mai le kalapu vaafaila a Samoa, o le tamaitai o Vaimooia ma le alii o Eroni Leilua sa tapena ma koleni i Aukilani i Niu Sila a o lei agai atu mo le faamoemoe i Farani.
