Ua faailoa e le pulega o le Lakapi Samoa fili a le Manu Samoa ma le Manusina mo le taamilosaga lakapi ta’ito’afitu faavaomalo i le faaiuga o le vaiaso nei e faia i Dubai, ma ose taamilosaga taua mo ‘aulakapi ta’ito’afitu a alii faapea ma tama’ita’i a lo tatou atunuu.
Ua mae’a faailoa suafa o i latou ua filifilia mo le ‘aulakapi fitu a le Manusina ma le Manu Samoa ma faailoa ai e le Ofisa Sili o le Lakapi Samoa o ni ‘au ua filifilia ma le talitonuga o le a latou tauave le igoa pele o Samoa i se tulaga maualuga.
O taaloga o pulu o loo faatulaga mai ai o le a taalo le ‘au ta’ito’afitu a le Manu Samoa ma ‘au a Tonga, Hong Kong China ma Colombia ae taaalo le Manusina i le vaega o pulu o ‘au a tama’ita’i ma Argentina, Colombia, ma Polani.
O le Aso Toonai, 17 ma le Aso Sa, 18 o Ianuali e faagasolo ai lea taamilosaga lakapi ta’ito’afitu faavaomalo i Dubai.
