E masalomia e sau mai atunuu i fafo telefoni taufaamata’u lea o loo aafia ai aoga i le vaiaso nei.
O lea ua lua aso sosoo o lenei vaiaso o tapunia faafuase’i ma aveese faavavevave mai fanau mai aoga ona o telefoni taufaamata’u nei o loo maua e aoga.
O ananafi o aoga i Masterton, Kaikōura, Greymouth, Queenstown, Levin, Whanganui, Ashburton ma Palmerston North.
O faiga taufaamata’u foi nei na aafia ai aoga i North Island i le Aso Lua.
O le tele o telefoni o loo faasino i se meatotino faapei o se pomu ma o loo talitonu ai leoleo e tasi lava le tagata o loo sau ai nei valaau.
E lē fou faiga taufaamata’u e sau mai atunuu i fafo e pei ona ta’ua e sui o le matagaluega o aoga.
Ae mai le ofisa o leoleo, ua galulue nei foi ma paaga faavaomalo e su’esu’e atili lenei mataupu.
