O le alii pese Samoa ia Sam Ah Chookoon poo Mr Cowboy ua iloga ai e le toatele lea ua ripotia mai le oo ai i le tulaga maualuga i faatulagana o Pese i totonu o Niu Sila (top of the charts in NZ) i lana fatuga ua faaigoaina Obladi Oblada.
I ripoti a le Samoa Observer na faailoa ai le faitau miliona o tagata o loo faalogologo i lea fatuga fou talu mai lava ona faalauiloa. O le aso 15 o Tesema na muai faailoa ai lea pese ma na oo lava i le tulaga muamua.
Na iloga foi le sao o lea alii pese ina ua fesoasoani i se sailiga tupe mo alii ma tamaitai Pasefika o loo galulue i galuega faavaitaimi i se tausaga ua tuanai i Hawkesbay Niu Sila.
O Sam e mai le alalafaga o Vaitoloa i Apia, o lana ata pese lea o loo maualuga nei taumafaiga na pueina i Samoa i se tasi o faatoaga. O loo mafai ona auai ai foi nisi o fanau a le atunuu i lea atapese.
Ua tele tausaga o atinae le olaga pese o Sam na amata mai lava i totonu o Samoa, i lona aiga ma lana aoga seia oo ina oo i tulaga ua iai nei. O Sam o se tasi o tupulaga e toatele a Samoa ua maoa’e a latou taumafaiga i lenei taleni o le pese ma ua lauiloa foi a latou fatuga e le gata i Samoa, o le Pasefika faapea le lalolagi atoa.
