I le 12 o a’oga i le atunuu na faata’ita’i ai le polokalame o le aoina o otaota lafoa’i e gaosia mai le uga e pei o fagu pa’u ma pepa iila, e 6,631 kilokalama le mamafa o ia otaota na mafai ona aoina e fanau ma faia’oga o ia a’oga e 12 i totonu o le 3 masina.
O se polokalame lenei ua fesoasoani le vaega o polokalame o atina’e a Malo Aufaatasi le UNDP e faatupe i le faaaogā o ni pisinisi ao otaota lafoa’i se lua, e la te faatautaia.
O a’oga na faata’ita’i ai lea taumafaiga o le a’oga a tulagalua a Sagata Maria i Savalalo, a’oga o le Vaiala Beach School, Ah Mu Academy, a’oga tulagalua a Malisi i Mulivai Apia, o le a’oga tulagalua ma le kolisi maualuga a Robert Louis Stevenson, a’oga a le Peace Chapel, Le Amosa o Savavau o se tasi o a’oga tulagalua tuma’oti, Kolisi a tamaitai i Paupauta, aoga tulagalua a Tanugamanono, faapea kolisi o Leififi ma Avele.
O le autū o lea polokalame faata’ita’i ia mafai ona a’oa’oina mafaufau o fanau i le tāua o le galulue faatasi e taofi le faateleina o otaota lafoa’i e pei o fagu pa’u ma pepa iila mai le lafoa’i solo, ae ia faaputu ma ave i pisinisi o feagai ma le aoina o ia ituaiga o otaota.
O se taumafaiga ua iai le talitonuga a lelei ona faatino o le a faaitiitia aafiaga o le siosiomaga aemaise o otaota faapea e la’u atu i le nofoaga o loo lafoa’i ai lapisi eseese i Tafaigata.
