E 900 vine(vines) lea o loo ola i le faatoaga a le tina ia Shelly Burich i lona fanua i Vaoala lea o loo mafai ona gaosia ai nisi o oloa o loo maketi e le gata i Samoa nei ae o atunuu e mamao. 

Na faaalia ai e lenei tina le amataga o le tau atia’e o lana toaga i tausaga ua mavae. 

“O le 2007 na amata totō ai pe tusa ma le 50 vanilla vines o se gaioiga foi lea ta te nofonofo ma faifai ae sa iai la matou kulupu i lena vaitaimi e 60 matou e fai matou faatoaga vanilla vines nei.

“E oo mai i le taimi lenei e toe lava o a’u o loo faaauau lenei faatoaga mai le tele o faafitauli o le taumafai lea e maua le tomai e faafailele ai lenei laau e aunoa ma se tupe e faatino ai.

“E lua afā na aafia ai Samoa i lena vaitaimi ma faaleagaina ai le tele o vanilla vines ae peitai sa ou tu malosi ia aua ne’i avea nei faafitauli ma auala e faavaivailoto ia ta ita.” 

Na ta’ua e Burich e mai le 50 o laau na totō e oo mai le asō ua 900 o loo ola i se kuata eka o lona fanua ma o lea ua manuia ai i lenei pisinisi o loo taumafai ai. 

“O le 2016 na resitala ai loa la’u pisinisi o se sole trader ona faavae ai loa lea o le Vaoala Vanilla ma amata ai ona maketi le vanilla i totonu lava o Samoa e amata ai.

“Na faatau atu i faletalimalo, o falekeke ma na faatau atu lava na o Vanilla beans i tagata kuka foi ia e iai le tomai latou te iloa faaaogā le vanilla bean i kuka ma mea faapena. 

“Mai le 2016 i le 2019 na amata faalauiloa ai loa ni a’u oloa se 2 na gaosia mai le vanilla e pei o le Vanilla extract ma le Vanilla syrup mo kuka ma baking ona o se manaoga a nisi o bakers ma turisi pe mafai ona gaosi mai nisi oloa e ese mai le vanilla beans.”

A o aafia ai Samoa i le pepesi o le faama’i Koviti-19 faatasi ai ma le Misela na liliu ai lenei tina e faaaogā auala faatekonolosi e maketi ai ana oloa. 

“Ona ua tapunia alavaa ma lē mafai ona malaga mai ni turisi i le atunuu, na ou liliu ai loa e faaaogā upega tafailagi e faaauau ai le maketiina o a’u oloa i atunuu i fafo ma airfreight ai oka a nisi sa mananao mai i oloa.” 

O oloa nei o loo maketiina e le Vaoala Vanilla e aofia ai le Premium Grade 1&2 vanilla beans mo le tuuina atu i atunuu e mamao, Vanilla Extract 10 ma le 95 mililita i le fagu ma le Vanilla Syrup lea o loo faatauina i le 25 170 ma le 300 mililita i le fagu lea o loo mafai ona maketi atu i Niu Sila, Ausetalia, Canada ma Amerika faapea ai ma Samoa nei.

“E telē lava se polofiti sa maua ai o le 2021 i le 2022 na amata ai loa ona ou faia ni aoaoga e faasoa ai foi le tomai i le faiga o le faatoaga vanilla i nisi o sui fou o loo tau amata. 

“O le aogā foi o le faaaogā ai o auala faatekonolosi na ou vaaia ai le toatele o tagata sa latou mauaina le website sa fai e maketi ai a’u oloa nei ma ua oo i Amerika ma Canada i nai o tatou tagata o loo aumau ai.

“E le gata i lea e faatino lava a’u tours o turisi aemaise a tatou lava tagata e afifio mai e silasila ma vaai foi i se taumafaiga vaivai a si nei tina i le totōina o le vine o le faafaileleina o lenei laau seia oo lava ina faaaogā.” 

O le Aso Lulu na mafai ona asia ai e le Fofoga Fetalai a le Malo o Niu Sila ma nisi o le aumalaga le Vaoala Vanilla. 

“O le asiasiga a le Malo o Niu Sila o se avanoa lea e molimauina ai foi le agalelei faasoasoa e ala i seleni o loo fesoasoani mai ai lenei Malo i nai a tatou pisinisi.

“Na filifilia le Vaoala Vanilla e le polokalame a le Business Link Pacific faatasi ai ma le Samoa Chamber of Commerce o se pisinisi ua tele faafitauli na lofia ai ae o loo faamalosi pea e taumafai.”

O le mau a lenei tina i le taumafaiga o lana pisinisi ia iloa lelei ma silafia le mafuaga tatau ua naunau ai e faia se pisinisi. 

“E iai lo’u talitonuga a faapea ua iai le manatu e faavae sau pisinisi ia e fesili lava pe aisea ae poo le ā foi le mafuaaga. 

“O lo’u lava manatu i si a’u fanau ia o latou iloa e leai se mea e lē mafai ona fai e le tagata pe a aunoa ma le lē tuuina uma iai o le malosi ma le mafaufau. 

“E moni lava e ui i le tele o isi a tatou tiute ma faalavelave e lolofi mai pea i taimi uma e lē mafai ai ona maua le avanoa e faasoa ai o tatou tomai ua maua, ae ao lava ona ave se taimi tatou te asia ai komiti a tina i soo se afioaga e faasoa atu iai a tatou taumafaiga.

“Ia mafai foi e latou ona maua ai metotia e fai ai ni a latou pisinisi mai se vaega itiiti seia oo lava ina telē ma ola le pisinisi.”