E lē galo e manatua pea tuaa ma mātua sa asaina sailiga malo auā se Tuto’atasi o Samoa ina ia sa’oloto ona tagata mai pulega a isi Malo i fafo. O se lagona e tupu pea ma fafagu mai ai ia i tatou, mātua ma tuaa ua lagomau i tiasa o Tupu ma E’e, Tamalii ma Failauga o Sa’oao Faletua ma Tausi ma le lautele o tatou tagata sa togi maa i le fausia o le Malo tuto’atasi o Samoa.

O le ‘au’au lea o le malelega faamanuia a le Afioga i le Ao o le Malo i le faamanatuina o le 60 tausaga o le tuto’atasi ina ua malele i le malae o le faautugatagi a le atunuu i le sauniga faalemalo. O le tausaga e 1906 e tusa o tala faamaumau na amata ai le sailiga malo a Samoa ma e taunuu mai i le aso muamua o Ianuari o le tausaga e 1962 ua lata i le 57 tausaga o finau pea tuaa ma mātua i latou sa lotolotoi i sailigamalo i le fia tuto’atasi o Samoa ina ia sa’oloto ona tagata mai pulega faakolone.

Se vaega o le malelega faamanuia a le afioga i le Ao o le Malo afioga Tuimalealiifano Vaaleto’a Sualauvi II. O le tamaitai Palemia o le ta’ita’ifono o le Komiti o le Tuto’atasi na faafetaia Malo valaaulia i le tali faaaloalo i le valaau a le Malo e faatasi atu i le sauniga faalemalo o le 60 tausaga o le tuto’atasi.

Le ta’ita’ifono o le Komiti o le Tuto’atasi le afioga i le tamaitai Palemia Fiame Naomi Mataafa.