Ua logo uma le lalolagi atoa i le tuumalo ai o le Ta’ita’i poo le Faaao foi lea o le Ekalesia Katoliko Roma i le Lalolagi atoa, o Pope Falanisisi, i le Aso Gafua o le Eseta, aso 21 Aperila 2025 i lona maota i le Vatikana.
Ma i le oo mai ai o lenei tala faanoanoa, ua manatua ai e le to’atele o tagata, ta’ita’i o Ekalesia ma le Malo o Niu Sila, le Tamā Pope ia Falanisisi mo le tele o ana galuega i le tele o atunuu i le lalolagi.
O isi o galuega e manatua ai lava Pope Falanisisi o lona tula’i malosi e fesoasoani ma galue e tetee atu i le tele o faiga faasolitulafono, o le faaalia o ona manatu e aofia ai le fesoasoni mo ē e lima vaivai, ma lona galue ina ia iai se sootaga vavalalata o le Lotu poo le Ekalesia ma tagata.
Ua lipotia e le Leitio Faavaomalo a Niu Sila le amata tapenapena ai e sui o le Ekalesia Katoliko i Niu Sila, mo ni sauniga lotu e manatua ai lenei Ta’ita’i o le ekalesia, e faafetaia ai lona sao i le tele o Ekalesia i le lalolagi.
Ua ta’ua foi i lipoti e lē taumate le to’atele o tagata o le a aga’i i Italia e molimauina toe sauniga o le Tamā Pa’ia.
E faamauina, e fai lava sina umi o feagai Pope Falanisisi ma faafitauli i lona soifua mālōlōina e pei ona ia fetaia’i ai ma le limonia, ma e ta’ua sa fai lava sina tugā o aafiaga.
O Pope Falanisisi na soifua mai le tausaga 1936 ma o ia o se ulua’i tagata Amerika Latina ua faauluulu iai le Ekalesia Aoao, ma o le 88 o ona tausaga lea ua maliu ai nei o ia.
Puna o Faamatalaga: https://www.rnz.co.nz/news/national/558746/religious-political-leaders-across-aotearoa-mourn-pope-francis-death
