O polokalame faaleleia poo rehabilitation program mo pagota  e faia ai ma faatalatalanoaga faapitoa (counselling) i faafitauli faalemafaufau ma le faaletagata ua faailoa mai ai le manaomia o tagata e iai tomai faapitoa i lea galuega mo Tanumalala.

Na faailoa e le Faamasino Sinia le afioga Vui Clarence Nelson i le Samoa Observer o se tasi lea o faafitauli i le nofoaga o loo tuli ai faasalaga a le au solitulafono o le lē iai o ni tagata e iai le tomai faapitoa i polokalame toe fuata’i e faia lea auaunaga. 

Taua e Vui o le tele o mataupu e oo atu i le faamasinoga a vaavaai iai faataitaiga o se mataupu i se tasi na aafia poo seisi foi na faia lea gaioiga e ono iai le manatu e ave i polokalame toe fuata’i nei. E le gata i lea o le tele o nei polokalame e faatino e sui o Faalapotopotoga Tumaoti tauala atu i le vaega o nofo vaavaaia a le Matagaluega o Faamasinoga. 

Peitai taua e Vui o mataupu ogaoga faapea e manaomia ai tagata ua iai tomai faapitoa poo specialists ona o le tele o mataupu e tatau ona fesiligia tulaga o faafitauli faale mafaufau o loo aafia ai lea tagata poo faafitauli faaletagata soifua. 

O le tele o nisi polokalame e pei ona taua ae Vui o loo agai tele lava i tulaga faaleagaga peitai e leai se polokalame faapitoa e faapea mo i latou e molia i le faia o amioga mataga ma le fai aiga faamalosi o le a nofosala i le falepuipui, ma a’o nofosala ai o le a mafai ona auai i se polokalame faapitoa lea.

O le unai a le faamaisno sinia o le toatele lea o tagata e molia atu i moliaga matuiā a maea ona tuli le faasalaga ona toe molia foi lea i le solitulafono ona e le’o lava polokalame faapitoa faalemafaufau (mental state) i totonu o falepuipui e taumafai e fofō ai le faafitauli.