Ua ave le faatalauula a le Matagaluega o Puna’oa Faalenatura ma Siosiomaga i le atunuu ua faailoa lautele ai le mana’omia o ni tagata e mafai ona latou tuuina atu ni mana’oga poo le Expression of Interest, e faaaogā ai i ni atina’e tau pisinisi fanua ma eleele o le malo, o loo iai le fale o le RSA lea o loo lisi e le Tatiana Investments.
O se tasi lea o nofoaga i le ogatotonu o le taulaga o loo lotolotoi ai le tele o pisinisi tuma’oti, ma e tulalata foi i auaunaga eseese a le malo.
E pei ona silafia o se tausaga e lei mamao atu sa tula’i mai ai ni feteena’iga i le va o le Matagaluega o Tiute ma Tupe Maua o loo iai le komiti e pulea le avamalosi ma le pulega o le pisinisi o loo lisi i le fale o le RSA ma lea fanua o le malo.
O loo iai pea lea pisinisi i le taimi nei, ae o le faasalalau faalaua’itele o le toe faaaogāina o ia aseta a le malo i se isi atina’e tau pisinisi o le aso 31 o Oketopa e faamuta ai le avanoa mo nisi e fia ave o latou mana’oga e faaaogā ai ia meatotino a le malo mo nisi atina’e tau pisinisi.
