O le Aso Lua o le vaiaso nei sa tula’i ai i le Faamasinoga Faaitumalo i Mulinuu mo le ulua’i valaauga o ona moliaga tau taavale afi, le Faipule o Aleipata Itupa i Lalo ua faamavae ma le tofi Minisita o le Kapeneta, ma ua faailoa ai e le itu a leoleo e lima moliaga ua faamautū faasaga i le afioga Faleomavaega Titimaea Tafua.
Peita’i ua talia e le faamasinoga le talosaga a le loia o loo tula’i mo le Faipule mo se vaiaso e tuu atu se’i silasila ai i moliaga a leoleo.
Ua toe tolopo ai i le Aso Lua a sau lenei mataupu e aunoa ma se tali ua tuuina atu o se tali a Faleomavaega Titimaea Tafua i ona moliaga.
O le masina na te’a nei o Mati na faamavae ai lē ua molia ma le tofi Minisita o le Kapeneta ae alo e tali ona moliaga e mafua i se faalavelave tau taavale i le masina lava na te’a nei.
O loo tuua’ia e leoleo le sui Faipule o Aleipata Itupa i Lalo i le ave taavale faatamala ua mafua ai ona tupu le faalavelave ma manunu’a ai ni tagata.
