Ia aveesea isi komiti, ae faaitiitia le fuainumera o isi a le Auckland Council.

O lea o loo faaauau pea ona fetuunai ma toe faatulaga pulega ma komiti a le pulenuu fou o Aukilani Wayne Brown.

I ripoti e le o se mataupu faigofie na iai le fonotaga ananafi a le pulenuu ma ana komiti e pei ona faia ai i le Town Hall a Aukilani.

Ae mai le pulenuu, e le o se tagata na maluelue lana faaiuga ona o le lē fiafia o nisi, ma i ana saunoaga e leai ni feutanaiga, o le faaiuga foi ua iai, pau le mea na te taliaina o le faamavae mai pe a le auai.

Ae mai se tasi e lei fiafia i faaiuga a Brown e pei o Chris Darby, e lei taofiofia lona manatu na te teena ai le filifili lava e le pulenuu o tagata e o i totonu o laulau a fono ona e ono mafai ona piki ai lava e ia tagata e manao iai.

Mai ia Darby, atonu e mafai ona fai i le Far North lea sa pulenuu muamua ai Brown ae le mafai i Aukilani.

E uma le fonotaga ananafi e lei maua se tonu, ma o lea ua toe tolopo lenei mataupu i le isi fonotaga e faia i le faaiuga o le masina.