E maua le avanoa o sui faipule o le Palemene e saunoa ai i teuteuga o le Tulafono fou o Fanua ma Suafa pe a oo ina mae’a lelei tapenaga o loo feagai ma le Matagaluega o Faamasinoga ma le ofisa o le Loia Sili a le Malo aemaise o paaga totino a le matagaluega o faamasinoga ma le faafoeina o mataupu tau faamasinoga, ona faataatia lea i luma o le Fono Aoao Faitulafono o ia teuteuga mo le talanoaina.

Ua faailoa e le afioga i le tamaitai Minisita o Faamasinoga le tofa Matamua Vasati Sili Pulufana lea fuafuaga ina ua tali i saunoaga faalauaitele a sui faipule sa latou fesiligia poo fea ua fai iai vaega o le Tulafono o Fanua ma Suafa o le tausaga 2020 lea sa faataatia ese e lē faaaogāina ae se’i tālia ni teuteuga.

O atugaluga foi o sui usufono e pei o le faipule o Falelatai ma Samatau i le tuai tuuina atu i le Palemene o ia teuteuga na tali iai le ta’ita’i o le Malo le afioga i le Tamaitai Palemia. 

O le tali foi a le ta’ita’i o le Malo na ia afea ai ma le faai’uga a le faamasinoga maualuga i le tagi a lē sa avea ma Pelesetene o Faamasinoga o Fanua ma Suafa, e mafua ona sa oo iai se finagalo o nisi sui faipule ia latou saunoaga faalauaitele i le tala faatatau autu o le Tupe. 

O taualumaga a le fono aoao faitulafono i le po o le Aso Lua na amata tali ai Minisita o le Kapeneta i mataupu sa lāgā i saunoaga a sui usufono o le Palemene i le tala faatatau o le tupe mo le tausaga faaletupe fou 2024 i le 2025.