E eseese finagalo faaalia o le au tapuai a le Matildas i le po o le Aso Lulu i le iuga na iai le taaloga na saili ai so latou avanoa mo le sailiga o le siamupini i le Ipu o le Lalolagi i le soka i le itupa o tamaitai.

Na tulaga ese foi lea taaloga i le finau na iai o ‘au uma e lua.

E ta le ‘afa muamua o loo sili Egelani i le 1-0 a Ausetalia peitai e lei leva ona amata le ‘afa lona lua ae maua loa le ‘ai o Ausetalia ma tutusa ai i le taitasi.

Na toe finau mai Egelani ma maua ai isi a latou sikoa e lua ma manumalo ai i ‘ai e 3-1.

Lona uiga la o le a sauni Egelani e fetaui ma Spain i le finals.

E ui i le malolo o le ‘au a Ausetalia ae o le manatu laualuga ua maualuga le tulaga ua oo iai le taumafai a le ‘au a tamaitai pe a fua i tausaga ua tuanai, o lea ua faatoa oo mo le uluai taimi i le sailiga o le semi finals.

Ia atonu o le a fai foi i si Matilda le isi upu taatele i taimi faapenei, e le mua uma ni vaa ma e toe oso lava foi le la.