Ua sola nei Spain ma le Ipu o le Lalolagi i le taaloga soka a le itupa o tamaitai e pei ona maimoaina e le toatele i le po anapo.
Peitai o le kapeteni o le latou ‘au ma o le faaolatotoga foi lea i le finauga a Spain, le tamaitai o Olga Carmona lea na mauaina le sikoa e tasi sa faatoilaloina ai Egelani i le la sailiga siamupini, ua feagai nei ma se tala faanoanoa i le maliu o si ona tamā faatoa faailoa ia Olga ina ua mae’a le taaloga.
Na lipotia e le Newshub faatoa faailoa le tulaga lea i le tamaitai taalo ina ua mae’a le taaloga ma momoli iai faamaisega mai le faalapotopotpoga o le soka i le lalolagi.
Na lipotia ua leva ona feagai le tamā o Olga ma mafatiaga i gasegase o le tino ma na maliu ai i le Aso Faraile ae o le faaiuga a lona aiga ma uo e lē ta’uina i le tamaitai taalo le tala faanoanoa seia mae’a le taaloga.
Sa faimalaga mai lona tina ma ona tuagane i Niu Sila nei mo le taamilosaga peitai na toe faavave i Spain ona o le gasegase o le tamā ma toe foi ane ai i Ausetalia i le Aso Toonai mo tapuaiga o le ‘au ma le faailoa o le tala faanoanoa ia Olga.
O ‘ai o le fetauiga ma Egelani e 1-0 ma ua siamupini ai nei Spain i le Ipu o le Lalolagi mo le uluai taimi.
