E ui ua manumalo lava Niu Sila i le series poo le faasologa o taamilosaga taitoafitu i le lakapi i le lalolagi ae na faatoilaloina e Samoa i le sailiga o le apa memea i le vae mulimuli o le taamilosaga sa faia i Lonetona lea na faaiuina i le vaveao analeila.

Na faia’ina Niu Sila ia Fiti i le semifinals 19-17 ae lusi le avanoa o Samoa e agavaa sa’o ai mo le Olimipeka i Paris ma le avanoa foi i le Ipu autu ina ua faia’ina ia Argentina i le isi semifinals ma see ai loa i le sailiga o le tulaga tolu ma le fā. 

O Argentina na manumalo i le vae lea o le taamilosaga i Lonetona ina ua faia’ina ai Fiti i ‘ai e 35-14.

O le faatulagana la ua iai nei ina ua mae’a aloaia le series, ua siamupini ai lava Niu Sila i le tulaga muamua, Argentina i le tulaga lua, Fiti i le tulaga tolu, Farani i le tulaga fā, Ausetalia ua tulai mai i le tulaga lima ma ua agavaa ai foi mo le Olimipeka i Paris i le tausaga fou ma Samoa ua iai nei i le tulaga ono ma manumalo i le pine apa memea o le taamilosaga lea i Lonetona ina ua faia’ina ai Niu Sila i ‘ai e 24-19.

Toe oso pea le la e pei o upu masani i faagatama ma toatele foi ua momoli le faamalo ma le faafetai i nai alo o le atunuu ona o le sao sa faatino i le avea ai ma avefu’a a Samoa i taaloga o lakapi taitoafitu i vaega e fia o le lalolagi.