O le Aso Lua o le vaiaso na te’a nei na maliu ai se alii sa avea ma leoleo ma umia le tulaga faaleoleo o le satini, ae o loo tālia le lauina o se faasalaga i moliaga i lona faia o ni sootaga tau faiaiga i se tamaitai o se leoleo.
Ua faailoa e le Komesina o leoleo i se lipoti i le faaiuga o le vaiaso o loo faia suesuega i le maliu o Reupena Oloapu ma o loo masalomia ai le faaaogāina o se vailaau oona.
Ua tusa nei ma le vaiaso talu ona toe tolo e le faamasinoga le lauina o lana faaiuga i le aso 7 o Iuni, i moliaga e tolu sa molia ai lē ua maliu.
Na logo ane e le loia sa tulai mo Reupena i le aso na faatulaga e lau ai le faaiuga, o lē o loo molia o loo taofia i le falemai i Savaii, o le mafuaaga lea na lē taunuu ai ona lau le faai’uga ae toe tolopo i le masina fou.
O Reupena Oloapu sa ia vaaia le pou poo le ofisa o leoleo i Fagamalo i Savaii, o le nofoaga lea na tulai mai ai i le masina o Fepuari o le tausaga e 2021, moliaga solitulafono sa tuua’ia ai.
