Ua salalau ai i luga o upega tafailagi ma alaata faasalalau le maliu ai o le alii 25 tausaga o Connor Garden-Bachop.  

O se tala na faate’ia ai le toatele o tagata aemaise le li’o o aulakapi o Niu Sila, e pei ona iai lana kalapu lakapi o le Highlanders ma le ‘aulakapi o le Maori All Blacks.

I se faamatalaga mai le laulauafono o le New Zealand Maori Rugby, o le Highlanders, o le Wellington Rugby ma le asosi o le ‘au taaalo lakapi a Niu Sila le New Zealand Rugby Players Association na o latou faailo ai le faanoanoa tele o tagata uma o le li’o o le taaloga lakapi i le maliu faafuase’i o lenei alii taalo o le atunuu.  

Ma i lea faamatalaga na o latou faaleo ai o latou faamaisega ma upu faamafanafana i le mamalu o aiga i le motusia ai o le mafutaga ma sē pele i loto ma agaga.  

Na o latou ta’ua o Connor o se tama taalo tausaafia ma sē ua iloga i ana soātau taaalo poo le auuso foi ona o lona faamaoni i le taaloga.  

I lipoti mai le NZ Herald, na faapena ona logoina leoleo i le maliu, faapea o se maliu faafuase’i i Fendalton.

E oo mai i le taimi nei e lē o mautinoa poo le ā le mafuaaga tonu na maliu ai lea alii taalo, ae faaalia i faamatalaga mai sui o le lakapi a Niu Sila, na maliu Connor i le Aso Gafua ona o se itu tau o le soifua maloloina poo le medical event.

Ae i le taimi nei e lē o iai ni masalosaloga i le maliu ai o Connor Garden-Bachop.

Puna o Faamatalaga: https://www.nzherald.co.nz/sport/rugby/super-rugby/highlanders-player-connor-garden-bachop-dies