Ua faamaonia mai le maliliu ai o ni alii talavou se toalua mai se faalavelave faafuasei ina ua malelemo i Samalaeulu i Savaii.
O nei taulele’a e toalua e tausoga peitai na tausi faatasi mai i laua ma ta’u ai o le au uso. I ripoti a Ofisa faasalalau na taua ai e le sui o le aiga sa agai i laua ia e taeele i se vaega e ta’u o Solomea ae aafia ai loa le isi alii i galu malolosi o le sami, sa taumafai le isi e sefe mai lona uso peitai e le’i manuia ona e fai si malolosi o galu i lea vaega o le moana.
Taua e le Sui Komesina o Leoleo Auapaau Logoitino Filipo na logo atu i latou i le aoauli o le
Aso Sa ma agai loa malu o le Mālō i le
Ofisa i Fagamalo e tali atu i le valaau faatasi ai ma le Pulega Tineimu i le motu tele i Salafai. O le Aso Gafua na auina atu ai seisi vaega poo le joint team e fesoasoani i le galuega.
Taua e le Samoa Global o se tasi o tausoga a taulele’a ua maliliu na ia taua “O loo vaaia pea tino maliliu a nai o’u tausoga, ae le’o mafai ona o iai i lalo nisi e taumafai e aumai o la tino ona o loo mau i va o papa”.
Taua e le Komesina o le Pulega o le Tineimu Tanuvasa Petone Mauga o le Aso Gafua na maua ai le tino maliu o le tasi peitai o loo galulue pea e saili le tino maliu o le isi taule’ale’a. O loo iai le naunautaiga a le Pulega ina ia to’a le tau aemaise o le sami ina ia mafai ona faaauau ai sailiga o le tino maliu o se tasi o taule’ale’a.
