O le to’asefulufā o le aumalaga o alii ma tamaitai o leoleo i falepuipui i Niu Sila sa malaga mai i lenei vaiaso mo se soo ma leoleo o falepuipui i Samoa, ua faaalia e se tasi o tamaitai o se faauluuluga o se vaega o leoleo i le falepuipui i Aukilani le faletua o Daisy Fau Tanuvasa, e telē le tāua o le latou mafutaga ona ua latou silafia ai le eseesega o siosiomaga o loo galulue ai, ae o lu’itau o loo feagai ma leoleo falepuipui i Samoa.
Na maua se feiloa’iga ma Daisy i le faletalimalo o le Taumeasina o loo api uma ai le latou aumalaga, ma sa fesiligia ai i nisi o vaega tāua o le latou soo, e pei ona sa latou asia le falepuipui i Vaiaata i Savaii ma le falepuipui i Tanumalala.
O se tasi o vaega tāua sa fesiligia ai le faletua o Daisy Fau Tanuvasa o aiātatau o i latou e faamaonia solitulafono ae nofosala i le falepuipui.
O se faatalanoaga ma le faletua o Daisy Fau Tanuvasa o se tasi o pule o le auaunaga i le falepuipui i Aukilani Niu Sila.
O le tausaga e 2004 na malaga mai ai i Samoa nisi o le pulega o lea falepuipui i Samoa ma saili atu ni tagata faigaluega mai Samoa ia i latou na manuia i le nofomau i le tausaga e 2003.
O Daisy ma le toatele o le latou aumalaga na faamanuiaina ai i ia avanoa faigaluega e pei ona avea ai ma leoleo o le falepuipui, le Auckland Region Women’s Corrections Facility.
O le afiafi o le Aso Tofi o lenei vaiaso na faia ai le faatasiga faai’u o lea mafutaga, ma taualuga i se aiavā, a o lei toe lūlūlima ma faatofa leoleo o falepuipui i Samoa ma le aumalaga o alii ma tamaitai leoleo o falepuipui i Niu Sila.
