Ua uma le tui o le fulū ma le booster o le Palemia Chris Hipkins ma ua ia faamalosi mai ai i tagata e agai e faia tui.
A o amata ai lenei masina fou o lea ua faaopoopo tagata agavaa mo le isi booster o le Koviti ua ta’ua o le bivalent.
Na faia uma tui nei o le Palemia a o iai i Upper Hutt i le taeao o le Aso Toonai faatasi ma le minisita o le soifua maloloina Dr Ayesha Verrall.
Na saunoa ai le minisita o le soifua maloloina e mafai lava ona faia uma tui nei e lua i le taimi e tasi.
I tui o le fulū e tusa ma le 800,000 tui ua taunuu, ae o tui o le Koviti e silia ma le 700,000 ma ua faamaonia e le minisita e tele isi tui o loo faatali.
O le bivalent e faia fua e aunoa ma se totogi, ae o tui o le fulū e le o tagata uma e faia fua ma o lea foi e iai fale faigaluega o loo ofo fua mai mo ona tagata galulue.
