Ua faaali le fiafia ma le faagaeetia o fanau aoga a le Kolisi maualuga a Palauli i Sisifo ina ua tatala aloaia le faletele poo le Hall a le Kolisi na faatupe e le malo o Iapani.
O se vaega mataina na faafeiloai ai le kuata lona lua o aoaoga mo lenei tausaga ona o lenei atinae ua tino mai mo fanau aoga a le Kolisi. Na ave ai foi le faamalo a le afioga le Amepasa o Iapani, Mr Senta Keisuke i le aoga Palauli Sisifo ma le Komiti ona o le galuega ua mae’a.
E silia ma le ‘afa miliona le tau aofai o le galuega atoa ma o le fesoasoani a le malo o Iapani ua faaigoaina o le Grant Assistance for Grass-Roots Human Security Projects. O le tatala o lenei galuega na molimauina e sui o le malo o Samoa, le afioga i le Minisita o Aoga, Taaloga ma Aganuu, le Minisita o Tupe afioaga Mulipola Anarosa Ale Molioo, le afioga i le Amepasa o Iapani Mr Senta Keisuke faapea le afioaga atoa ma fanau o le kolisi.
E tele ni faafitauli na feagai ma le kolisi e ala lea i le faatinoga o polokalame a fanau aoga ona o le leai o se fale mautu ma lelei mo ia faamoemoe peitai o lea ua tino mai ma tatala aloaia le Hall fou o le a faafaigofie ai aoaoga a fanau o le Kolisi o Palauli Sisifo.
