O le faaiuga o le vaiaso na faatoa taunuu ai le taunuuga o sailiiliga na faia i Niu Sila e sailia ai poo le a tonu le ituaiga vairusi o le faama’i Koviti-19 ua pesia ai Samoa.

Ua faailoa mai ai i ia sailiiliga o le B1 Omicron lea na mua’i pipisi i le tele o atunuu o le lalolagi. Faaalia i pepa o faamatalaga a le Soifua Maloloina o le ituaiga lea na pesia ai atunuu i le amataga o le tausaga nei peitai ua faasolo ina pepesi tele atu ai le isi ituaiga Omicron o le B2 lea foi ua aafia ai Niu Sila ma Ausetalia.

I le malaga faapitoa lea ma tulai mai i Niu Sila i le Aso 29 o Mati, le Aso Lua o le vaiaso na te’a nei lea na suia ai aso faanofoesea o pasese i le 7 aso, ua toe faaopoopo nei i le 10 aso ona e to’a fa nisi o le pasese e to’a 219 na maua i o latou suega ina ua taunuu le faigamalaga ua aafia i le siama o le faama’i.