E fai si ma’ale’ale o le tulaga o loo iai le maliega i le va o Amerika, Isaraelu ma Iran lea ua taofia ai nei fetauiga i Sasa’e Tutotonu mo le 2 vaiaso a o faagasolo talanoaga.
Fai mai lipoti aupito lata mai a le CNN, ua faailoa e le Islamic Revolutionary Guard Corps a Iran ua taofia feoa’iga a vaa i le Strait of Hormuz ona o se tulaga ua lipotia ane mai Lepanona ua solia ai e Isaraelu aiaiga o le maliega.
O loo manino le faaaliga a Amerika i le maliega lea e faapea o le a faaauau le maliega pe a tumau pea ona tatala le ogasami lea poo le Strait e pei ona ta’ua.
O loo lipotia faamatalaga mai le faigāmalo a Trump faapea foi ma le Palemia o Isaraelu o Netanyahu, o le taofia o fetauiga i le va o Amerika ma Iran e lē aofia ai fua ma gaioiga o loo faia a Isaraelu faasaga i le Hezbollah i Lepanona.
Fai mai a itiiti mai pe to’a 182 ua maliliu ma le faitau selau o loo manunu’a o tagata Lepanona ona o osofa’iga a Isaraelu talu ona amata le taua.
Ua lipotia mai foi o loo fuafua le sui peresetene o Amerika, JD Vance ma le sui faapitoa o Amerika, Steve Witkoff e aga’i i Islamabad i Pakistan mo talanoaga ma Iran i le Aso Toonai ae ua feta’ua’ina se faamatalaga mai le Fofoga Fetalai o le Palemene o Iran e faapea o nisi o vaega o fuafuaga a Iran ua oia a o lea e le’i amataina talanoaga.
O le popolega la i le to’atele o loo māta’itūina pea lenei matāupu ona o lea ua lipotia i le BBC lapata’iga a Iran o le a toe tali ane foi i osofa’iga a Isaraelu ia Lepanona pe afai lava e lē taofia vave loa.
Puna o Faamatalaga: https://edition.cnn.com/2026/04/08/world/live-news/iran-war-trump-us-ceasefire
