O le tautoga ua mae’a fofogaina i luma o le afioga i le Faamasino Sili, e le afioga i le tama’ita’i faamasino filifilia o le Faamasinoga Faaitumalo le afioga Sili Elizabeth Chan Tung Peters, o lana ta’utinoga lea i luma o le Atua ma Samoa i lona saga’i atu e faatino ona tiute e aunoa ma le fefe, faapito, alofa, faaitu’au poo le loto tigā.
Na faatumulia le potu faamasino numela tasi o le Faamasinoga Maualuga i mamalu faalemalo, le mamalu o alii ma tama’ita’i faamasino, o aiga ma uo aemaise o le matāgaluega o faamasinoga i le sauniga sa faatauto ai i le Aso Lua le tama’ita’i faamasino filifilia o le Faamasinoga Faaitumalo.
O le afioga i le faamasino ua mae’a faatauto sa galue i le ofisa o tausi mavaega a le malo mo se vaitaimi, ae sa auauna foi ma galue i nisi o ofisa loia tuma’oti.
Sa galue foi i se ofisa loia i Aukilani Niu Sila a o le’i taliu mai i le atunuu ma faaauau ai lana galuega faaloia.
O le vaiaso a sau e faato’ā faagasolo ai galuega a le faamasinoga i le tagofia o matāupu tau solitulafono ma matāupu lautele i le va o tagata poo civil court cases.
