O le alii taalo o Junior Amone mai le St George Illawara lea ua lipotia mai ua falepuipui ina ua mae’a ona molia i le faaoolima ma le faaleagaina o mea.
O Talatau Junior Amone na faia iai e leoleo moliaga i le masina talu ai ona o se faalavelave na aafia ai o loo feta’ua’ina sa ia faaaoga ai se samala e lata i lona fale i Wollongong.
Na pue e leoleo ma ua molia ona o le mataupu lea i le aso 15 o Novema.
E lei talosaga mo le tatalaina o ia i tua ma o le Aso Faraile sa tatau ona tulai ai i le faamasinoga.
Ua logoina foi la e lana kalapu le mataupu i le integrity unit a le NRL.
O se faamatalaga mai leoleo o loo feta’ua’ina ai e toalua alii faigaluega sa galulue i se nofoaga na afea e ni alii se toatolu faaaupegaina i samala.
Fai mai leoleo na tulei mai ai se tasi o nei alii mai le pito i luga o le fale sa faigaluega ai ma mafua ai manuaga.
O Amone o se tasi o sui o le au a Tonga na iai i le ipu o le lalolagi i le lakapi liki na sei mavae atu nei ma faatoa mae’a lana konekarate i le Dragons i le faaiuga o le 2024.
