I lipoti aupito lata mai o le taua i Iran ua faailoa mai e le CNN ua malie Trump o le a taofia fetauiga ma Iran mo le 2 vaiaso ae ia malilie atu Iran e tatala le Strait of Hormuz i le taimi lea ma ua lipotia ua malilie ane foi Isaraelu i lea tonu.
Ua faailoa mai le faaaliga lea a Trump ina ua mae’a le folasaga a le Palemia o Pakistan, o Shehbaz Sharif ina ia faatino le tonu lea ae faagasolo ni faatalanoaga i le va o Amerika ma Iran.
Ua faailoa mai e sui o le militeli a Amerika ua taofia mo le taimi nei osofa’iga a Amerika i totonu o Iran ma ua faailoa foi e Iran e pei ona lipotia e le CNN o le a faatulaga feoa’iga i le Strait of Hormuz i le taimi lea e taofia ai fetauiga.
O se vaega o le maliega e pei ona lipotia sa faailoa ane i se pepa o faamatalaga mai le Supreme National Council a Iran ua ta’ua ai le malie o Amerika e aveesea uma sā poo sanctions sa iai faasaga ia Iran.
Sa māta’itū e le lalolagi le matāupu lea i le asō auā o le ta o le 8 i le asō i le taimi Amerika e mae’a ai le taimi na faatulaga e Trump e uma ai le taimi sa tuu atu e Trump e tatala ai le Strait of Hormuz a leai o le a faapā loa e Amerika pomu i alalaupapa ma nofoaga o power plants i Iran.
O le po anapo ma le taeao analeila na vaaia ai tagata Iran ua faapotopoto i luga o nofoaga ia ma faatali’oli’o ai.
E to’atele ua fiafia i le tonu ua faia nei ae manatu nisi talosia ia mulimulita’i e Amerika lea tulaga ae faapea foi ia Iran.
Puna o Faamatalaga: https://edition.cnn.com/2026/04/07/world/live-news/iran-war-trump-us-israel
